منتديات فراشات الحب

عزيزي الزائر / عزيزتي الزائرة يرجي التكرم بتسجبل الدخول اذا كنت عضو معنا
او التسجيل ان لم تكن عضو وترغب في الانضمام الي اسرة المنتدي
سنتشرف بتسجيلك
شكرا
ادارة المنتدي

ترحب بكم وتتمنى لكم قضاء اسعد الاوقات


    جدتي..وقصة فرعون..!! هع

    شاطر
    avatar
    DONT LOVE
    نائب المدير
    نائب المدير

    عدد المساهمات : 4
    نقاط : 9147
    تاريخ التسجيل : 13/07/2010
    العمر : 30

    جدتي..وقصة فرعون..!! هع

    مُساهمة من طرف DONT LOVE في الأحد 22 أغسطس 2010 - 8:58

    السلام عليكم ورحمة الله وبركاته
    ظهر الخير << ماله داعي صباح الخير وحنا بهالقوايل


    اليوم قبل الغداء بزع ولد خالتي الله يسلمه يبي يقول لجدتي قصة

    هو الظاهر ماتسد سمع بالشيبان والعجز أنهم يحومون التسبد مايصلحون تقص عليهم وتتعب نفسك لأنهم مايقتنعون ولا في أمل يبتلون يسمعون يملون يبون الزبدة

    مثل ولد عمي يقول الشيبان اذا ماجزت له السالفه ألتفت على الشايب الثاني وقال يا فلان مير وش صار على الأرض ذيك والا البنت هذيك قبلتني مسيار ؟؟

    المهم

    بزع طول الله بعمره وقال لجدتي مهنا سواليف يمه ودنا بسوالف الأولين << مسوي فيها أنه يعرف الأولين مب عاقل أبوجضعان وهو ورع توه من هالجيل الكلب

    قالت له خلصن سواليفي وسواليفك أنت كلهن قصار وعلطول يقضن << بالوجه ماعنده به

    قال خلاص ابقول لتس قصة فرعون المهم وهو يقول فرعون اللي قال أنا ربكم الأعلى
    نقزت جدتي قالت يخسى << بسم الله تونا بادينا اصبري الله يحفظتس هههه
    قال تعرفين قصة ماشطة فرعون يوم انها تمشط بنته أنه قبل ماتبدأ قالت بسم الله وراحت البنت قالت ابعلم ابوي وراحت وقالت لفرعون ان الماشطة تقول بسم الله
    قال وشلووون تقول بسم الله هو بوه إله غيري ؟
    نقزت جدتي وقالت ايه ياويلي البنت لو تدري ان ابوه يبي يزعل تسان ما قالت له هههههه
    قال يايمه ان الماشطة مؤمنة بالله وماهمه فرعون ولا غيره
    وعاد ناداها فرعون وجاب الزيت الحار واخذه عياله وكل شوي يحلت واحد بالدزدر
    خمطت حفظها الله وقالت اييييييه ياويلللللي لو هي تدري انه بيحلت عييله بالدزدر تسان ماقالت شي
    قال ولد خالتي يايمه ماهمها هي ماتبي الا الجنة وآخر ولد لها أخذه منها عمره يمكن شهرين يرضع وحلته بالدزدر
    المهم دخل بسالفة موسى عليه السلام وقال ان فرعون مره حلم واول ماقام نادى الكهنة وقال لهم عن الحلم يبي يفسرونه له
    قالو له يبي يجي ولد من اسرائيل اذا كبر يبي يذبحك قال فرعون للي عنده الخدم اي حرمه تجيب ولد اذبحوه
    وبعدين قالو له يافرعون كيف تذبح عيالهم وهم يخدموننا لو يموتون اللي عندنا خلاص ماعاد فيه خدم
    قال خلاص سنة اذبحوا وسنة لا تذبحون وبعده حملت ام موسى عليه السلام وبلشت بنفسها تدري انه لو بيطلع ولد خلاص بينذبح
    المهم تغبت عن الحريم والناس لأن فرعون يقول انه يرسل حريم يدخلون على البيوت ويشوفون الحريم اللي حاملات او توهم والدين
    وبعدت ماولدت جاها وحي انها تحط ولده بصندوق وتحط على البحر << يا تسبديه جدتي مهب مخليته يخش جو بالقصة الا وتحوقه
    وقال انها اول ماحطته وراح بالماء ضاق صدره .. اللي هي من ؟؟ يسأل جدتي
    قالت ايييييييييه << واضح المتابعه الجيدة ماشاء الله هههههههههههههه
    قال منهي ؟؟ << أششششكككل ايييييييييه
    قال اللي هي ام موسى عليه السلام (( عاد انا ناظرته بنص عين بغيت اقول اهجد يا كلب صجيتنا وجدتي مادرت عنك )) ههههههههه
    عاد يقول انهم لقوه عند قصر فرعون وسأل اللي عنده قالو هذا ولد جاي بصندوق قالهم اذبحوه قالت زوجته خله عندنا قرة عين لي ولك (( قابلني كان جدتي تدري وش هالكلمة )) قال يعني يوسع صدورنا بالقصر
    قال خلاص قرة عين لتس انتي بس انا مابيه (( عاد قال ان الرسول صلى الله عليه وسلم يقول لو هو قايل قرة عين لي ولك كان نفعته هالكلمة ))
    بعدها بيرضعون موسى عليه السلام وبدأ يصيح ولا يرضع مايبي كل الحريم اللي جابوهن مارضع منهن يقول همن شافته اخته وعرفت انه اخوه قالت بوه حرمه اكيد بيرضع منه
    وراحت وجابت له امه ورضع منه واسكت
    وبعد ماكبر صار نشيط نشيط بالحيل
    وهو يمشي بالشارع لقى اثنين يتهاوشون واحد من مصر وواحد من اسرائيل يبي يفك بس اللي من مصر بتل يهاوش ما اسكت همن عطاه بقس (( الله لا يوريكم يوم قال عطاه بقس بغيت ارجفه واقول له لا عمرك تقص الله يرحم خالتي اللي جابتك )) يقول همن مات اللي من مصر
    المهم وراح على السالفه ذي فترة ويحسب الناس مادرو عنه
    ولقى هوشه مره ثانيه واحد من مصر وواحد من اسرائيل وفكهم نفس الاوله وبدا اللي من مصر يهاوش ما اسكت (( ماتلاحظون ان المصريين مهايطيه الى الحين بس يلزم البقس والا طررااق عشان يعرف وشلون يلج )) المهم قال اللي من مصر تبي تذبحن مثل ماذبحت اللي قبل من مصر
    بعده عرف موسى عليه السلام ان سالفته منتشره وراح وهو يمشي شاف ناس تزعب من البير (( اللي يبي يعرف وش معنى تزعب يروح يسأله )) وبوه بنات قاعدات بعيد عن البير وساكتات واضح انهن مستحيات
    جاء لمهن موسى عليه السلام وقالهن وراه ماتزعبن من الماء قالن ان ابوي قالنا روحن جيبن ماء وحنا ننتظر لين يخلصون الرجال بعده نزعب يقول يهارجنه وهن مستحيات
    يقول راح وزعب لهن ماء وعطاهن وقال وين ابوكم وقالن الحقنا

    امير تخطم جدتي

    قالت لا ياولدي انهن عندهن غنم وسارحات بالغنم

    قال لاااااااااااا (( انا قلت اغديه مل من التخطيم ويهديه الله ويسكت فقع روسنا )) قال هذي القصة الصدزية يا يمه

    وهم رايحين لم ابوهن شاف ان البنات مستحيات والظاهر قال انه يبان شي من جسمهن بعده خلاهن يمشن ورى وهو قدام وقال لهن اذا بغيتن تروحن يمين اجدعن حصاة يمين واذا بغيتن يسار اجدعن حصاة يسار
    ومشو لين وصلو لم ابوهن والابو استغرب بالعادة البنات مايجن الا المغرب وهالمره جايات الظهر راحن بناته وعلمنه السالفه قالن ان هالرجال زعب لنا الماء وجابنا
    قاله الشايب الله يجزاك خير وانا ودي انك ترعى الغنم عندي 8 سنين واذا تبي ترعاهن 10 سنين هذا كرم منك وابزوجك وحده من بناتي
    بعد ماخلص المده تزوج بنت من بناته ورجع لبيته يبي يشوف امه ودخل المدينة بالليل والناس نايمين والجو بااااررررررررد (( انا تحمست من كلامه عن الجو بديت اتثاوب )) وراح ونام
    (( المهم انا نسيت اكثر السواليف لاني ياما رحت ياما جيت احتريه يقضي ))
    يقول همن شاف فرعون وقال يا فرعون اغديك تسلم قال فرعون انا الإله قال موسى عليه السلام ابعطيك اللي عندي وشف اذا اقتنعت والا بكيفك
    دخل يده بمخباته وطلعه واثره بيضاء وجدع العصاء وتطلع هذيك الثعبان الكبيرة اللي تخوف وخاف منها موسى عليه السلام
    قال فرعون هذا سحر قال موسى عليه السلام طيب الله سبحانه يحيي ويميت قال فرعون انا احيي واميت ونادى اللي عنده قالهم جيبو اثنين ووقفهم عنده وذبح واحد وترك واحد قال شفت انا احيي واميت

    نطت جدتي قالت صدز ؟؟ << ياااااااااارب وش دخل صدز بغيت أقوله يمه قومي الله يجزاتس خير وتروشي وقولي اشهد ان لا اله الا الله واشهد ان محمد رسول الله أجل صدز يايمه والله انتس فله

    قال لا يمه بس تركه وشلون تبينه يحيي وهذاك الثاني ذبحه بس
    وبعدين قال موسى عليه السلام يافرعون الله سبحانه كل يوم يطلع الشمس من المشرق نبيك حنا الصبح تطلعه لنا من المغرب احس ان فرعون ماااات حرر
    وبعده عاد نطت جدتي مدري وشي مداخلاته الجديدة مهب عاقله الطريقي بخط الستة

    وسلامتكم




    مايستفاد من القصة << الى الحين عندك أمل ان فيه فايده
    1- والله يا فرعون عربجي وصايع
    2- طبعاً فيها فايدة وهي التذكير وليس الاستهزاء بالقصة لأن الرجال مجتهد ويهارج جدتي بالبريداوي مب بس العاميه
    3- لأحد يبزع يسولف على شايب والا عجوز لأنهم يحومون تسبدك ولا هوب مقتنعين بررررد الله يهديك
    avatar
    e7sas3ashe8
    مدير المنتدى
    مدير المنتدى

    عدد المساهمات : 198
    نقاط : 9855
    تاريخ التسجيل : 20/03/2010
    العمر : 29

    رد: جدتي..وقصة فرعون..!! هع

    مُساهمة من طرف e7sas3ashe8 في الأحد 22 أغسطس 2010 - 9:27

    هههههههههههههههههههههههههه يعطيك الف الف الف عافية سايلنت

    بس ايش معتى تزعب ؟؟؟؟؟؟؟

    ترى البعض ما يعرف>>>>>مسوي اعرف اللحين
    avatar
    قلبي واحد ما يملكه اثنين
    عضو نشيط
    عضو نشيط

    عدد المساهمات : 108
    نقاط : 9137
    تاريخ التسجيل : 23/08/2010
    الموقع : في مملكتي

    رد: جدتي..وقصة فرعون..!! هع

    مُساهمة من طرف قلبي واحد ما يملكه اثنين في الأربعاء 1 سبتمبر 2010 - 7:50

    شكرا لك على الموضوع

      الوقت/التاريخ الآن هو الجمعة 16 نوفمبر 2018 - 5:42